Hantanoro, poeta mandinika

Tsikimilamina Rakotomavo
Nanao ahoana ny fihetseham-po tamin'ny fahombiazana ?

Hantanoro
Faly satria tsy dia nanam-po hoe hahazo loka fa dia andrana ho amin'ny fanombanan-tena ny antony nandraisana anjara. Dia faly sahirana sahala amin'ny akoho kely notsipazam-potsim-bary.

Tsikimilamina Rakotomavo
Inona no heverinao fa nampiavaka anao miohatra amin'ny mpifaninana hafa ?

Hantanoro
Inoako fa ny fitanisako an-tononkalo ireo mpanoratra fanta-daza toa an-dry Di..., Razafiarivony, Esther Andriamamonjy, Nalisoa Ravalitera sy ny hafa, fa indrindra i Nirhy-Lanto izay antom-pifaninanana noho ny faha-100 taonany no antony nampirona ny safidin'ny mpitsara. Niezaka mafy aho mba haneho ny mahazava-dehibe sy manan-danja ny fananana azy ireo.

Tsikimilamina Rakotomavo
Mpanoratra vehivavy ianao. Inona no tombony amin'ny vehivavy poeta ?

Hantanoro
Ny toetra voajanahary anay vehivavy dia ny fananana ny saina miditra lalina sy tia mandinika ary mamoaka ny an-tsipiriany amin'ny fiainana.

Tsikimilamina Rakotomavo
Inona no lesoka hitanao amin'ny haisoratra malagasy ankehitriny ?

Hantanoro
Tsy ampy ny fahafantaran'ny olona ny asasoratra malagasy noho ny fahavitsian'ny fanaparihana azy ireny eny amin'ny fiarahamonina. Tsy mamokatra loatra na vitsy ny famokarana amin'ny alalan'ny boky na tahirin-kevitra hafa ny haisoratra malagasy. Sakana izany ho fampandrosoana ny haisoratra.

Tsikimilamina Rakotomavo
Inona àry no vahaolana azonao aroso hanarenana izany lesoka izany ?

Hantanoro
Voalohany dia mila fiaraha-miasa ny poety sy mpanoratra ao anaty fikambanana sy vondrona samihafa. Kanefa faritana tsara ny tanjona iaraha-miasa. Ohatra : mampitovy fijery aloha amin'ny vina apetraky ny fikambanana tsirairay avy. Ny tanjona dia :

- ny fanandratra ny haisoratra sy ny soratr'ireo mpanoratra sy poety malagasy.
- Laharam-pahamehana ny fanomezan-danja ny teny malagasy. Koa araka izany dia ireo poeta sy mpanoratra no tokony hampiasa ny teny voalohany.

Ireto ireo asa entina manantanteraka ny tanjona :

Fantarina ireo karazan-kevitra sy zava-misy manodidina ny haisoratra. Faritana ny manahirana ohatra :

- fanatsarana ny hakanton'ny karazana haisoratra soratana.
  Vahaolana : fikarakarana atrikasa iombonana.
- fahasahiranana ara-pitaovana sy ara-bola amin'ny fanoratana sy famoahana sangan'asa...

Jerena izay mety azo iaraha-miasa amin'ny ireo manana ny fahalalana matihanina na tsia amin'ny fanontana ny boky ohatra. Mpanonta boky no tiako horesahina eto.

Tsikimilamina Rakotomavo
Tena zava-dehibe mahaliana avokoa ireo nambaranao ireo. Koa misaotra anao nanaiky nitapatapakahitra teto amin'ny tranonkala Poetawebs

Hantanoro
Ianareo tranonkala Poetawebs no ankasitrahako manokana tsy nisalasala nampandroso.
Mirary soa.